अमित शहांच्या हस्ते डॉ. अप्पासाहेब यांचा महाराष्ट्र भूषण पुरस्काराने सन्मान, हा माझ्या कार्याचा गौरव- अप्पासाहेब

अमित शहांच्या हस्ते डॉ. अप्पासाहेब यांचा महाराष्ट्र भूषण पुरस्काराने सन्मान, हा माझ्या कार्याचा गौरव- अप्पासाहेब

केंद्रीय गृहमंत्री अमित शहा यांच्या हस्ते महाराष्ट्र भूषण पुरस्कार ज्येष्ठ निरूपणकार, पद्मश्री डॉ. अप्पासाहेब धर्माधिकारी यांना प्रदान करण्यात आला . नवी मुंबईतील खारघर येथील आंतरराष्ट्रीय कॉर्पोरेट मैदानावर हा जंगी सोहळा पार पडत आहे. एखाद्या शासकीय सोहळ्याचा इतका मोठा इव्हेंट करण्याची महाराष्ट्राच्या इतिहासातील ही पहिलीच वेळ आहे. संपूर्ण महाराष्ट्रातील नव्हे तर देशातील अनुयायी या मेळाव्यास उपस्थित आहेत .

मुख्य मुद्दे 

सोहळ्यासाठी खारघर येथील मैदानावर अप्पासाहेबांच्या 5 लाखांहून अधिक श्रीसदस्यांनी हजेरी लावली आहे. ते शुक्रवारपासूनच शिस्तीने नवी मुंबईकडे निघाले होते. गेल्या काही दिवसांपासून या सोहळ्याची तयारी सुरू आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्यासह संपूर्ण सरकारी व भाजप – शिवसेनेची यंत्रणा हा सोहळा ‘ना भूतो न भविष्यति’ करण्यासाठी झटले. सुमारे 600 हून अधिक स्वयंसेवक, 200 कर्मचारी तैनात करण्यात आले आहेत.

मोठी वोट बँक आकर्षित करण्यासाठी युतीचे प्रयत्न!

डॉ. अप्पासाहेब व त्यांचे पिता नानासाहेबांचे देशभरात लाखो अनुयायी आहेत. कोकण, मुंबईत ही संख्या मोठ्या प्रमाणावर आहे. यापैकी बहुतांश लोक ठाकरेंच्या शिवसेनेला मानणारे होते. या सोहळ्याच्या माध्यमातून ही ‘वोट बँक’ आकर्षित करण्याचे शिंदे व भाजपचे प्रयत्न असल्याची चर्चा जनमानसात सुरु आहे. गुजरात, उत्तर प्रदेश, तमिळनाडू, केरळ, आंध्र, कर्नाटक, मध्य प्रदेशातून हजारो श्रीसदस्य सोहळ्यासाठी आले आहेत. अमित शहांसारख्या बड्या नेत्याकडून अप्पासाहेबांचा गौरव करुन या अनुयायांचीही मने जिंकण्याचा भाजपचा प्रयत्न यातून स्पष्ट होतांना दिसत आहे .

तयारी 20 लाख लोकांच्या सोयीची, 350 डॉक्टर्सही देणार सेवा

सोहळ्यासाठी अप्पासाहेबांचे 5 लाखांहून अधिक अनुयायी येण्याचा अंदाज आहे. मात्र ही संख्या किती वाढेल याचा अंदाज नसल्याने सरकारने 20 लाख लोकांची सोय होईल एवढी यंत्रणा सज्ज ठेवली आहे. यात पिण्याचे पाणी, स्वच्छतागृह, पार्किंगचा समावेश आहे. रेल्वेस्थानकापासून सोहळ्याच्या ठिकाणी येण्यासाठी मोफत बसची सोय केली आहे. कार्यक्रमस्थळी 250 टँकर, 2100 नळ बसवण्यात आले आहेत. 69 रुग्णवाहिका, 350 डॉक्टर्स, 100 नर्स आणि आरोग्य कर्मचारी कार्यरत आहेत. 32 फिरती शौचालये, 4200 पोर्टेबल शौचालये, 9 हजार तात्पुरते शौचालये बांधण्यात आली आहेत. 22 ठिकाणी पार्किंगची सोय आहे.