शेतकऱ्यांसाठी पाचोरा कृषी उत्पन्न बाजार समितीचा मदतीचा हात: शेतमाल तारण कर्ज योजनेचा शुभारंभ

शेतकऱ्यांसाठी पाचोरा कृषी उत्पन्न बाजार समितीचा मदतीचा हात: शेतमाल तारण कर्ज योजनेचा शुभारंभ

पाचोरा, २४/०६/२०२५ (प्रतिनिधी) : पाचोरा कृषी उत्पन्न बाजार समितीने शेतकऱ्यांच्या हितासाठी एक महत्त्वाचे पाऊल उचलले आहे. अवकाळी पाऊस आणि प्रतिकूल हवामानामुळे शेतीमालाचे मोठे नुकसान होत असताना, शेतीमालाला योग्य भाव न मिळाल्याने शेतकरी मेटाकुटीला येत आहेत. या पार्श्वभूमीवर, पाचोरा कृषी उत्पन्न बाजार समितीच्या संचालक मंडळाने कृषी पणन मंडळ, पुणे यांच्या मार्गदर्शनाखाली शेतमाल तारण कर्ज योजना सुरू करण्याचा निर्णय घेतला आहे. या योजनेची प्रभावीपणे अंमलबजावणी सुरू झाली आहे, ज्यामुळे शेतकऱ्यांना मोठा दिलासा मिळणार आहे.

या योजनेअंतर्गत, शेतकरी अनिल विश्वासराव पाटील (रा. पाचोरा) यांना आज २,००,०००/- (दोन लाख रुपये) रकमेचा धनादेश प्रदान करण्यात आला. बाजार समितीचे सभापती गणेश भिमराव पाटील यांच्या हस्ते हा धनादेश सुपूर्द करण्यात आला. यावेळी संचालक प्रकाश शिवराम तांबे, विजय कडू पाटील, युसुफ भिकन पटेल, सचिव बी. बी. बोरुडे, उपसचिव प्रतिक रमेश ब्राम्हणे आणि कर्मचारी वसंत चैत्राम पाटील यांच्यासह इतर कर्मचारी उपस्थित होते.

शेतमाल तारण कर्ज योजनेची ठळक वैशिष्ट्ये:

• कालावधी: १८० दिवसांसाठी
• कर्ज मर्यादा: शेतीमालाच्या एकूण किमतीच्या ७०% पर्यंत
• व्याज दर: वार्षिक ६%
• आधार: वखार महामंडळाची पावती

बाजार समितीने आवाहन केले आहे की, शेतकऱ्यांनी आपला शेतीमाल सुरक्षित ठेवण्यासाठी तसेच वाढत्या बाजारभावाचा फायदा घेण्यासाठी या योजनेचा लाभ घ्यावा. सभापती श्री. गणेश भिमराव पाटील, उपसभापती प्रकाश अमृत पाटील आणि सर्व संचालक मंडळाच्या वतीने हे आवाहन करण्यात आले आहे.

या योजनेमुळे शेतकऱ्यांना आर्थिक संकटातून बाहेर पडण्यास मदत मिळेल आणि त्यांना आपल्या शेतीमालाची योग्य किंमत मिळेपर्यंत तो सुरक्षित ठेवता येईल, अशी अपेक्षा व्यक्त केली जात आहे.