शेतकऱ्यांच्या अतिवृष्टी भरपाईतील कोट्यवधींचा घोटाळा: महसूल कर्मचारी अमोल भोईवर गुन्हा दाखल, मुख्य सूत्रधाराचा शोध सुरू!

पाचोरा, ३१ ऑगस्ट, २०२५: पाचोरा तालुक्यात शेतकऱ्यांसाठीच्या अतिवृष्टी नुकसान भरपाई निधीत तब्बल १ कोटी २० लाख रुपयांचा महाघोटाळा उघडकीस आला आहे. तहसीलदारांचा विश्वास संपादन करून त्यांच्याच युजर आयडी आणि पासवर्डचा गैरवापर करत, ७ गावांमधील २२५ बनावट आणि अपात्र लाभार्थ्यांच्या खात्यात कोट्यवधी रुपये वळवण्यात आल्याचा धक्कादायक प्रकार समोर आला आहे. याप्रकरणी पाचोरा तहसीलदार विजय शिवाजी बनसोडे यांनी तत्कालीन महसूल सहाय्यक अमोल सुरेश भोई आणि एका प्रशिक्षणार्थी शिकाऊ व्यक्तीविरोधात पाचोरा पोलिसांत तक्रार दाखल केली असून, गुन्हा नोंदवण्यात आला आहे. भोई याच्या निलंबनाचा प्रस्ताव जिल्हाधिकारी कार्यालयाकडे पाठवण्यात आला आहे.

असा झाला घोटाळा उघड

अमोल भोई याच्याकडे अतिवृष्टीमुळे झालेल्या पीक नुकसानीसाठी अनुदान वितरणाची माहिती संकलित करून ती ‘ई-पंचनामा’ पोर्टलवर अपलोड करण्याची जबाबदारी होती. मात्र, त्याने तहसीलदारांचा युजर आयडी आणि पासवर्ड वापरून वडगाव आंबे, वडगाव आंबे बु., वडगाव आंबे खु., वडगाव जोगे, कोकडी, पिंपळगाव आणि लोहारा या सात गावांमधील २२५ अपात्र व्यक्तींची नावे आणि बँक खाती यादीत घुसडली. या बनावट लाभार्थ्यांच्या खात्यात एकूण ₹८३,७३,५५२ इतकी रक्कम जमा करण्यात आली.

तपासात असेही आढळून आले की, यापैकी १२२ लाभार्थ्यांनी २०२२ सालीदेखील अशाच प्रकारे अनुदान लाटले होते. तसेच, १२३ लाभार्थ्यांची नावे आणि त्यांचे गट क्रमांक ऑनलाइन ७/१२ उताऱ्यांशी जुळत नसल्याचेही निष्पन्न झाले, ज्यामुळे हा घोटाळा सुनियोजित असल्याचे स्पष्ट झाले.

‘कॉपी-पेस्ट’ची चूक सांगून दिशाभूल करण्याचा प्रयत्न

प्रकरण उघडकीस येताच, अमोल भोईने ही केवळ ‘कॉपी-पेस्ट’ करताना झालेली चूक असल्याचे सांगून कारवाई टाळण्याची विनंती केली होती. मात्र, १४ ऑगस्ट, २०२५ रोजी नेमलेल्या समितीच्या सखोल चौकशीत हा गैरव्यवहार २०२२-२३ आणि २०२४-२५ या कालावधीत झाला असून, एकूण घोटाळ्याची रक्कम ₹१,२०,१३,५१७ असल्याचे समोर आले. भोईने पुरावे नष्ट करण्याच्या हेतूने WhatsApp ग्रुपवर शेअर केलेली यादी डिलीट करण्यास सांगून नंतर चुकीची नावे वगळून नवीन यादी शेअर केल्याचेही तपासात उघड झाले.

पोलिसांचा तपास सुरू, मुख्य सूत्रधार गजाआड होणार?

तहसीलदार विजय बनसोडे यांच्या तक्रारीवरून पोलिसांनी भारतीय न्याय संहिता, २०२३ च्या विविध कलमांखाली गुन्हा दाखल केला आहे. या प्रकरणामुळे संपूर्ण महसूल प्रशासनात खळबळ उडाली आहे. पोलिसांनी तपासाची चक्रे वेगाने फिरवली असून, या घोटाळ्यामागे केवळ अमोल भोई एकटाच आहे की यामध्ये आणखी मोठे अधिकारी किंवा रॅकेट सामील आहे, याचा शोध घेतला जात आहे. या तपासातून लवकरच या घोटाळ्याचा मुख्य सूत्रधार आणि इतर सहभागी आरोपी गजाआड होतील, अशी अपेक्षा व्यक्त केली जात आहे.