पाचोरा विधानसभा मतदारसंघ: मतदार यादीचे ‘विशेष सखोल पुनरीक्षण’ सुरू; नाव वगळले जाण्यापूर्वी करा ‘हे’ काम!
पाचोरा विधानसभा मतदारसंघ: मतदार यादीचे ‘विशेष सखोल पुनरीक्षण’ सुरू; नाव वगळले जाण्याची शक्यता, ‘हे’ काम तातडीने करा!
पाचोरा (प्रतिनिधी):
भारत निवडणूक आयोगाच्या निर्देशानुसार १८-पाचोरा विधानसभा मतदारसंघात लवकरच ‘विशेष सखोल पुनरीक्षण कार्यक्रम’ राबविला जाणार आहे. या प्रक्रियेअंतर्गत मतदार यादीतील त्रुटी दूर करण्यासाठी आणि पारदर्शकता आणण्यासाठी सध्या मतदान केंद्रस्तरीय अधिकारी (BLO) मार्फत पूर्वतयारी युद्धपातळीवर सुरू करण्यात आली आहे. यासंदर्भात पाचोरा उपविभागीय अधिकारी भूषण अहिरे यांनी मीटिंग हॉलमध्ये पत्रकार परिषद घेऊन सविस्तर माहिती दिली.
माहिती न दिल्यास नाव कापले जाणार!
प्रशासनाने स्पष्ट केले आहे की, मतदारांनी विहित नमुन्यात आणि वेळेत माहिती न दिल्यास, सखोल पुनरीक्षणानंतर त्यांचे नाव मतदार यादीतून वगळले जाण्याची शक्यता आहे. अशा परिस्थितीत होणाऱ्या नुकसानीस संबंधित मतदार स्वतः जबाबदार राहतील, असा कडक इशाराही देण्यात आला आहे.
काय आहे नेमकी प्रक्रिया?
पुनॅरीक्षण कार्यक्रमात प्रामुख्याने खालील तीन बाबींवर लक्ष केंद्रित केले जात आहे:
-
२००२ व २०२४ यादीचे मॅपिंग: ज्या मतदारांची नावे २००२ आणि २०२४ या दोन्ही वर्षांच्या मतदार यादीत आहेत, त्यांचे ‘मॅपिंग’ सध्या BLO मार्फत केले जात आहे.
-
नवीन मतदारांसाठी ‘वारसा’ पुरावा: ज्या मतदारांचे नाव २०२४ च्या यादीत आहे, परंतु २००२ च्या यादीत नाही, अशा मतदारांनी आपल्या आई-वडील किंवा आजी-आजोबांचे २००२ च्या यादीतील नाव शोधणे आवश्यक आहे. त्यांचे विधानसभा क्रमांक, भाग क्रमांक आणि अनुक्रमांक शोधून ही माहिती संबंधित BLO कडे जमा करावी.
-
नावे उपलब्ध नसल्यास ‘इन्युमरेशन फॉर्म’: जर स्वतःचे किंवा रक्ताच्या नातेवाईकांचे नाव २००२ च्या यादीत सापडत नसेल, तर घाबरून न जाता सखोल पुनरीक्षण सुरू झाल्यावर BLO कडून ‘इन्युमरेशन फॉर्म’ घ्यावा. हा फॉर्म अचूक भरून आवश्यक पुराव्यांसह जमा करणे अनिवार्य आहे.
२३ ते २५ मार्च दरम्यान ‘BLO’ येणार आपल्या दारी
येत्या २३ मार्च ते २५ मार्च २०२६ या तीन दिवसांच्या कालावधीत सर्व BLO विशेष मोहीम राबवून गृहभेटी देणार आहेत. या काळात मतदारांनी घराबाहेर न जाता किंवा आपली सर्व आवश्यक कागदपत्रे तयार ठेवून प्रशासनाला सहकार्य करावे, असे आवाहन उपविभागीय अधिकारी भूषण अहिरे यांनी केले आहे.
डिजिटल सुविधेचा वापर करा
मतदारांना माहिती शोधणे सोपे व्हावे यासाठी प्रशासनाने दोन पर्याय दिले आहेत:
-
QR Code: अधिकृत जाहिरातीतील क्यूआर कोड स्कॅन करून २००२ मधील नावे शोधता येतील.
-
ECINET App: या मोबाईल अॅपद्वारे २००२ मधील मतदार यादी, आपल्या भागातील BLO चे नाव आणि त्यांचा मोबाईल क्रमांक सहज उपलब्ध होईल.
मतदार राजा जागा हो! आपला मतदानाचा हक्क सुरक्षित ठेवण्यासाठी या प्रक्रियेत सक्रिय सहभाग नोंदवा आणि आपल्या भागातील BLO शी त्वरित संपर्क साधा. असे आवाहन प्रांत अधिकारी भूषण अहिरे यांनी पत्रकार परिषदेत केले आहे .
