लोहारी येथे ‘जय जवान जय किसान’ ग्रुपकडून शालेय साहित्य वाटप
पाचोरा, वार्ताहर: पाचोरा तालुक्यातील लोहारी गावातील ‘जय जवान जय किसान ग्रुप’ ने एक स्तुत्य उपक्रम सुरू ठेवला आहे. गेल्या चार वर्षांपासून हा ग्रुप प्रजासत्ताक दिन (26 जानेवारी) आणि स्वातंत्र्य दिन (15 ऑगस्ट) या दोन्ही दिवशी परिसरातील चार जिल्हा परिषद शाळांमधील विद्यार्थ्यांना शालेय साहित्याचे वाटप करत आहे.
लोहारी गावातील आर्वे, इंदिरानगर, लोहारी खुर्द, आणि लोहारी बुद्रुक येथील जिल्हा परिषद शाळांमधील सर्व विद्यार्थ्यांना या उपक्रमाचा लाभ मिळतो. दरवर्षी या दोन्ही राष्ट्रीय सणांच्या निमित्ताने विद्यार्थ्यांना वह्या, पेन, पेन्सिल यांसारख्या आवश्यक वस्तू दिल्या जातात.
या ग्रुपचा मुख्य उद्देश शिक्षणाला प्रोत्साहन देणे आणि विद्यार्थ्यांच्या गरजा पूर्ण करणे हा आहे. त्यांच्या या उपक्रमामुळे अनेक गरीब आणि गरजू विद्यार्थ्यांना मदत होते. ‘जय जवान जय किसान ग्रुप’ने सुरू केलेला हा सामाजिक उपक्रम इतर गावांनाही प्रेरणा देणारा आहे.
