ठाकरे बंधू एका व्यासपीठावर: राज ठाकरेंकडून फडणवीसांचे खोचक ‘कौतुक’, हिंदी सक्तीवरून सरकारला आव्हान !
ठाकरे बंधू एका व्यासपीठावर: राज ठाकरेंकडून फडणवीसांचे खोचक ‘कौतुक’, हिंदी सक्तीवरून सरकारला आव्हान !
मुंबई, ५ जुलै: आज शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेच्या वतीने वरळीतील एनएससीआय डोम येथे आयोजित विजयी मेळाव्यानिमित्त राज ठाकरे आणि उद्धव ठाकरे एकाच व्यासपीठावर आले होते. या ऐतिहासिक क्षणी दोघांनीही जोरदार भाषणे केली, ज्यात राज ठाकरेंच्या भाषणाची सुरुवात विशेष लक्षवेधी ठरली. “जे बाळासाहेबांना जमले नाही, ते देवेंद्र फडणवीस यांनी करून दाखवले,” असे म्हणत राज ठाकरे यांनी आपल्या भाषणाला सुरुवात केली.
राज ठाकरे म्हणाले की, “आम्हा दोन्ही भावांना एकत्र आणणं बाळासाहेबांना जमलं नाही, ते देवेंद्र फडणवीस यांनी करून दाखवलं.” या विधानामुळे उपस्थितांमध्ये एकच चर्चा रंगली.
हिंदी सक्ती आणि मराठी अस्मितेचा मुद्दा
हिंदी सक्तीच्या मुद्द्यावर राज ठाकरे यांनी सरकारला कडक शब्दांत सुनावले. “कुणालाही न विचारता हिंदी सक्ती कशासाठी? तुमच्याकडे सत्ता आहे म्हणून का? तुमची सत्ता विधानभवनात आहे, पण इथे रस्त्यावर आमची सत्ता आहे,” असे म्हणत त्यांनी सरकारला आव्हान दिले. “हिंदी बोलणारी राज्ये मागास आहेत आणि हिंदी न बोलणारी राज्ये प्रगत आहेत. मग आम्ही हिंदी शिकून असा काय विकास होणार आहे?” असा सवालही त्यांनी विचारला.
मुंबईला महाराष्ट्रापासून वेगळे करण्यासाठी आधी भाषेला हात घालण्याचा प्रयत्न झाल्याचे त्यांनी नमूद केले. विरोध झाल्यानंतर मागे हटलेल्यांना राज ठाकरेंनी “परत मराठी भाषेला हात लावून दाखवा,” असे आव्हान दिले.
इंग्रजी शिक्षण आणि मराठी अभिमानाची सांगड
सत्ताधारी आमची मुले इंग्रजी शाळेत शिकत असल्याचा युक्तिवाद करत असल्याचा मुद्दाही राज ठाकरेंनी खोडून काढला. “या दाव्याला काही अर्थ नाही. बाळासाहेब ठाकरे आणि माझे वडील श्रीकांत ठाकरे इंग्रजी शाळेत शिकले, पण त्यांच्या मराठी अभिमानाबद्दल कुणाला शंका आहे का?” असा प्रतिप्रश्न त्यांनी केला. तसेच, “लालकृष्ण आडवाणी मिशनरी हायस्कूलमध्ये शिकले, त्यांच्या हिंदुत्वावर कुणाला शंका आहे का?” असे म्हणत त्यांनी आपल्या मुद्द्याला बळकटी दिली.
शेवटी, राज ठाकरे यांनी मराठी म्हणून एकत्र आल्यावर लोकांना जातींमध्ये विभागले जाईल, असा इशारा दिला. या मेळाव्यामुळे राज्यातील राजकारणात नव्या समीकरणांची शक्यता वर्तवली जात आहे.
