निर्मल इंटरनॅशनल स्कूलमध्ये आंतरराष्ट्रीय योग दिन उत्साहात साजरा – विद्यार्थ्यांचा उत्स्फूर्त सहभाग
निर्मल इंटरनॅशनल स्कूलमध्ये आंतरराष्ट्रीय योग दिन उत्साहात साजरा – विद्यार्थ्यांचा उत्स्फूर्त सहभाग
पाचोरा:-
निर्मल इंटरनॅशनल स्कूल, पाचोरा येथे ११ वा आंतरराष्ट्रीय योग दिन अत्यंत उत्साहात आणि शिस्तबद्ध पद्धतीने साजरा करण्यात आला. सकाळच्या सत्रात शालेय प्रांगणात हा विशेष योग दिवस पार पडला. या कार्यक्रमाची सुरुवात शाळेच्या अध्यक्षा आदरणीय वैशालीताई सुर्यवंशी यांच्या शुभहस्ते दीपप्रज्वलनाने करण्यात आली.या विशेष प्रसंगी प्रख्यात योगाचार्य नारायण मांडवडे यांचे मार्गदर्शन लाभले. त्यांनी विद्यार्थ्यांना विविध योगासने आणि प्राणायाम प्रकारांचे प्रात्यक्षिकांसह सविस्तर मार्गदर्शन केले. तसेच योगामुळे होणारे शारीरिक व मानसिक लाभ, मनःशांती, ताणतणावमुक्त जीवनशैली यासंदर्भात विद्यार्थ्यांमध्ये जागृती निर्माण केली. आयुर्वेदाचे महत्त्व, त्यातील आहार-विहाराचे नियम यांचीही माहिती देऊन विद्यार्थ्यांना नैसर्गिक आरोग्याकडे वळण्याचे महत्त्व अधोरेखित केले.
या प्रसंगी शाळेचे सचिव श्री. नरेंद्रसिंग सुर्यवंशी, प्राचार्य श्री. गणेश राजपूत, जनसंपर्क अधिकारी श्री. आय बी सिंग, समन्वयक सौ. स्नेहल पाटील, प्रशासकीय अधिकारी श्री. संतोष पाटील, तसेच शाळेतील सर्व शिक्षक, शिक्षकेत्तर कर्मचारी आणि विद्यार्थी मोठ्या संख्येने उपस्थित होते.
या योग दिनाचे यशस्वी आयोजन व अंमलबजावणीसाठी शाळेतील क्रीडा शिक्षकांचे विशेष योगदान लाभले. त्यांच्या मार्गदर्शनाखाली विद्यार्थ्यांनी अत्यंत शिस्तबद्ध व उत्साहाने योगाभ्यास केला.या उपक्रमामधून विद्यार्थ्यांमध्ये योगाविषयी आत्मीयता, आरोग्याबद्दल जागरूकता व भारतीय परंपरेचा अभिमान निर्माण झाला असून योगदिनाच्या निमित्ताने शाळेतील संपूर्ण वातावरणात आरोग्य, शांती आणि सकारात्मकतेचा संदेश अनुभवास आला.
